თელავის მუნიციპალიტეტის საკრებულოს ეკონომიკისა და ქონების მართვის საკითხთა კომისიის სხდომაზე 2024 წლის ბიუჯეტის პროექტზე იმსჯელეს. 

მთავარი საფინანსო დოკუმენტის პროექტით გათვალისწინებული შემოსულობების შესახებ კომისიის წევრებს ინფორმაცია მერიის საფინანსო-საბიუჯეტო სამსახურის უფროსმა მიაწოდა. 

ნათია ვაყელიშვილის განმარტებით, მომავალი წლის ბიუჯეტის პროექტით შემოსულობების გეგმა 39 მილიონ 923 ათასი ლარით განისაზღვრება, რაც 4 მილიონ ლარზე მეტით აღემატება 2022 წლის დეკემბერში დამტკიცებული ბიუჯეტის მაჩვენებელს. 

ქონების გადასახადის საპროგნოზო მაჩვენებელი კი 9 მილიონ ლარს შეადგენს.   

ეკონომიკისა და ქონების მართვის საკითხთა კომისიამ უკვე დაიწყო რეკომენდაციების შემუშავება. 

სხდომაზე ამასთანავე იმსჯელეს მერიის მიერ ინიცირებულ პროექტებზე, რომლებიც ითვალისწინებს:

▶️ლევან გალუსტიანის მიერ ქ. თელავში, კავკასიონის ქუჩაზე მდებარე 30 კვ.მ. არასასოფლო - სამეურნეო დანიშნულების მიწის ნაკვეთის შეძენისას ნაკისრი სააუქციონო პირობის შესრულების ვალდებულებისგან განთავისუფლებაზე მერისთვის თანხმობის მიცემას;

▶️თელავის მუნიციპალიტეტის საკუთრებაში არსებული უძრავი ქონების ა(ა)იპ „ჩემი თელავისათვის“ და ასევე ა(ა)იპ „საქართველოს სამედიცინო ჰოლდინგისათვის“ პირდაპირი განკარგვის წესით, დროებით სარგებლობის უფლებით, უსასყიდლო უზუფრუქტის ფორმით გადაცემის შესახებ მერისთვის თანხმობის მიცემას;

▶️თელავის მუნიციპალიტეტის საკუთრებაში არსებული უძრავი ქონების საპრივატიზაციო ნუსხიდან ამოღებას.